සැර වුණත් රස ගුණ දෙන මහෞෂධය - ඉඟුරු (zingiber officinale)

සිරුර අධික ලෙස වෙහෙසීමෙන් ඇතිවන පේශි ඉදිමුම 25%කි න් අඩුකරලීමට, දිනපතා ඉඟුරු ග්‍රෑම් 2 බැගින් ගැනීමෙන් හැකිවන බව නවතම අධ්‍යයනයකින් හෙළිවී තිබෙනවා.
උතුම් ඖෂධය, මහෞෂධය, ලෙස හඳුන්වනු ලබන ඉඟුරු අපේ වෛද්‍යක්‍රමවල රෝග ප්‍රතිකාර සඳහා ,බෙහෙවින් යොදා ගැනෙන්නක්. එය විටමින් C, B6, මැග්නීසියම්, පොටෑසියම්, කොපර් මැංගනීස්, හා ප්‍රති ඔක්සිකාරක ගුණ සපිරි වට්නා ඖෂධයක්.
කුළුබඩුවක් ලෙස මස් මාළු පිසීමටත්, ඉඟුරු දෝසි ආදි රසකැවිලි සැකසීමටත් යොදාගන්නා අතර travel sickness රෝගීන්ට සහන සළසන පලදායි උදව්කරුවකු ලෙස ද හැඳින්විය හැකියි.

ආහාර රස ගැන්වීම මෙන්ම, තේ කෝප්පය රසවත් කිරීමටත් ඉඟුරු යොදා ගන්නා අතර එමගින් බොහෝ රෝග පීඩා සංසිඳෙනවා. දිනපතා උදෑසන ඉඟුරු තේ එකක් බීම අස්ථි නිරෝගි වීමට හේතුවන බව සඳහන් .
ප්‍රෝටීන් සහ මේදය බහුල ආහාරවලට ඉඟුරු එක්කර පිසීමෙන්, ඒවායින් ඇතිවිය හැකි උදරාබාධ වළකිනවා. අමු ඉඟුරු යුෂ මීපැණි හා දෙහි සමග මිශ්‍ර කර දීමෙන් අජීර්ණ සුවවනවා.
ජීර්ණයට හා ආමාශය සුවපත් කිරීමට උපකාරිවන ඉඟුරු ඛේටය හා අනිකුත් ජීර්ණ යුෂ නිපදවනවා.
ඉඟුරුවල ඇති gingerols මගින් පෝෂක උරාගැනීම වර්ධනය කර වේගවත් කර ආහාර ජීර්ණය වේගවත්කර දෙනවා.
ආහාර ගැනීමට පෙර ඉඟුරු කෑල්ලක් ලුණු හෝ සහිඳ ලුණු සමග කෑමෙන් ආහාර රුචිය වර්ධනය වනවා.
යුෂ මිරිකාගත් ඉඟුරු රොඩු සමේ ගැල්වීමෙන් කුරුළෑ මැකී සම පැහැපත්වනවා.

උණ, සෙම්ප්‍රතිශ්‍යාවට, ඉඟුරු කොත්තමල්ලි තම්බා බීම අතීතයේ සිටම පැවැත එන පුරුද්දක්.
සෙම් ප්‍රතිශ්‍යාවේදී සෙම් කෝපවීම්වලදී ඉඟුරු ඉස්මට මීපැණි දමා බීම ද හිතකරයි.
ශ්වසන මාර්ගය ආශ්‍රිත, ඇදුම, කැස්ස මැඩලීමටත් ඉඟුරු උපකාරීවනවා. උතුරන වතුරට ඉඟුරු හා ලෙමන් යුෂ මිශ්‍රකර බීමෙන් කැස්ස හා උගුර වණවීම් සුවපත්වනවා.
ඉඟුරු ඇල් දියෙන් අඹරා තලපයක් සේ සකසා නළලේ ගැල්වීමෙන් හිසේ අමාරුව දුරුකර ගත හැකියි.
ආර්තව අක්‍රමිකතා දුරු කිරීමටත් දරුවන් පිළිසිඳ ගැනීම් සඳහාත් ඉඟුරු කාන්තාවන්ට උපකාරි වනවා. එය වමන ඔක්කාර ගති ත් දුරු,කරනවා. පෙති කපා මීපැණිවල පොඟවා සපන්නට දීමෙන් ගැබිණියන්ට ඇතිවන ඔක්කාර වමන ගති දුරුවන බව සඳහන්. එහෙත් ගැබිණි මවුවරුන් ඉඟුරු අධිකව ගැනීම නම් සුදුසු නැහැ.
පාචන උදරාබාධ තත්ත්වයන් වැළැක්මට, බඩ පිපුම වැළැක්මට , මෙන්ම ආහාරවලින් සිරුරේ ඇතිවන විෂගති දුරලීමට ද ඉඟුරු උපකාරි වනවා. එසේ ම මල බද්ධය හා අසාත්මිකතා ද වළකනවා.
ආතරයිටිස් වේදනා නාශකයක් ලෙස ද ඉඟුරු ක්‍රියාත්මක වනවා . රුමැටොයිඩ් හා ඔස්ටියෝ පොරෝසිස් ආතරයිටිස් වේදනා ඉදිමුම් අඩුකර ලෙහෙසියෙන් අතපය ,සන්ධි ක්‍රියාකිරීමට හැකියාව ඇතිකරන ප්‍රදාහ වැළැක්මේ ගුණය ක් ඉඟුරු සතුයි.
ඉඟුරු කොත්තමල්ලි මිශ්‍ර තේ බීමෙන් ආතරයිටිස් වේදනාවලට සහන අත්කර ගත හැකියි.
පෙණහළු පුරස්ථි ග්‍රන්ථි , චර්ම බඩවැල්, ඩිම්බකෝෂ පිළිකා සෛල විනාශ කිරීමේ ශක්තියක් ද ඉඟුරුවල පවතිනවා.
රුධිර සංසරණය වර්ධනය කිරීමට ද උදව්වන එය ධමනි තුළ සිරව ඇති අහිතකර තෙල් ඉවත් කර හර්දයාබාධ ආඝාත තත්ත්වයන් වළක්වනවා. .
අහිතකර LDL බැහැරකර, හිතකර HDL වැඩිකර දෙමින් කොලෙස්ටරෝල් තත්ත්වය පාලනය කිරීමට උපකාරීවනවා.
මොළයේ ක්‍රියාකාරිත්වය වේගවත් කර එය ආතතියෙන් ආරක්ෂාකර දෙන අතර, ධාරණ ශක්තිය හා මතකය වර්ධනය කර දෙනවා. ඇල්ෂයමර් වැනි රෝගවලට ඉන් වැට බඳිනවා. ඉඟුරුවල ඇති gingerdiol සංයෝගය ප්‍රතිශක්තියත් වර්ධනය කර දෙනවා.
දිනපතා උදෑසන ඉඟුරු මිශ්‍ර වතුර වීදුරුවක් පානය කරන්නේ නම්, එය රුධිරගත සීනි පාලනය කර දෙන බව සඳහන්.

එසේම දිනකට සීනි අඩුවන හා ඉඟුරු වැඩිවන සේ සකසා ගත් තේ කෝප්ප දෙකතුනක් පානය කිරීමෙන් බොහෝ සෞඛ්‍ය ප්‍රතිලාභ අත්වන බව ද සඳහන්.
එහෙත් දියවැඩියාව සඳහා ඖෂධ ලබාගන්නන්ට නම් ඉඟුරු අහිතකර බවයි සඳහන්වන්නේ.
මයියොක්කා සමග ඉඟුරු පරිභෝජනයත් හිතකර නැහැ. මයියොක්කා ආහාරයට ගැනීමට පෙර හෝ පසුව හෝ ඉඟුරු කෑම බීම ව්ස වීමට හේතු විය හැකියි .

ඉඟුරුවලින් අත් බෙහෙත්

*උදරා බාධවලට
ඉඟුරු පෙති දිය ලුණු සමග සපා කෑම.
ඉඟුරු යුෂ හා දෙහි යුෂ ලුණු ,මිශ්‍රකර බීම.

*හිසේ අමාරුවට
ඉඟුරු තේ පානය

*ඉරුවාරදයට
ඉඟුරු පාවට්ට බෙලිකොළ බැදපු කොත්තමල්ලි තැම්බූ උණු දියෙන් ඇවාෂ්ප ඇල්ලීම

*බඩ පිපුම වැළැක්මට හා ජීර්ණය වේගවත් වීමට
ඉඟුරු තම්බා නිවා මීපැණි දමා බීම

*කැස්සට හා උගුර වණවීමට
නටන උණු ජලයට ඉඟුරු හා ලෙමන් යුෂ මිශ්‍ර කර බීම

*හුස්ම ගැන්මේ අපහසුතා ඇතිවිට
ඉඟුරු,යුෂට පරණ උක් හකුරු දියකර වරින්වර බීම