සුවඳ බෙදන විෂනාශක කරපිංචා (Murraya koenigil)

හොද්ද වෑංජනය රසවත් කර ගැන්මට යොදාගන්නා කරපිංචා අප සිරුර නොයෙක් අයුරින් ආරක්ෂා කර දෙන වටිනා ඖෂධයක් බව ඔබ දන්නවා ද?
එහි පංචාංගය ම ඖෂධීය ගුණයෙන් පොහොසත් බව ආයුර්වේදයේ සඳහන් වෙනවා.
යකඩ පොස්පරස් කැල්සියම් තන්තු විටමින් A B C E ප්රෝටීන් බීටා කැරොටින් වැනි පෝෂක ගණනාවකින් හා ප්‍රතිඔක්සිකාරක ගුණවලින් පොහොසත් කරපිංචා සෙම වාතය සමහන්කර, පීනස අජීර්ණ රක්ත දෝෂ බැහැර කර, පිළිකා සෛල විනාශ කර , සිරුරේ විෂහරණය කරන මහඟු ඖෂධයක්.
එය කටහඬේ තීව්‍රතාව ඇතිකරනවා. බර පාලනය කරනවා. වියපත් පෙනුම පමාකරනවා. මානසික ආතතිය දුරු කරනවා.
හර්දය රකිමින් ඇතුළත රුධිර නාලවල මේදය දියකර හැරීමේ ශක්තිය එහි පවතිනවා. රුධිර නාල පිරිසුදු වී, කොලෙස්ටරෝල් වැඩිවීම හා හදවත් රෝග ඇතිවීම ඉන් වැළකෙනවා. එසේ ම රුධිරයේ සීනි පාලනය කිරීමට ඇති හැකියාව නිසා එය දියවැඩියාවට එරෙහිව ත් ක්‍රියාකරනවා.
අක්මාව යහපත්ව තබාගන්නත් කරපිංචා ලබා දෙන්නේ නො මඳ ශක්තියක්. එහි මේද තැන්පත්ව ඉදිමුණු විට කරපිංචා සිහින්ව අඹරා ආහාරයට ගැනීමෙන් හෝ කොළ කැඳක් ලෙස පානය කිරීමෙන් සහන සැලැසෙනවා. අක්මාවේ පිළිකාවලටත් සෙංගමාලයටත් ඉන් වැට බැඳෙනවා.
ආහාර රුචිය වඩමින් ආහාර ජීර්ණ පද්ධතියේ ගැටළු විසඳීමට ද කරපිංචාවලට හැකියි. එභි පිළිකා සෑදීම වළක්වමින් පහසුවෙන් ආභාර දිරවීමේ ක්‍රියාවලිය පවත්වා ගැන්මට උපකාරී වෙනවා. කරපිංචාවල අඩංගු ෆීනෝල් රසායනය ලියුකේමියා පුරස්ථි ග්‍රන්ථි පිළිකා වලට එරෙහිව ද ක්‍රියාකරන්නක්.
උදරාබාධවලදී කරපිංචා කබලේ රත්කර කුඩුකොට කෝපි මෙන් පානය කිරීමෙන් සහනය ලබාගත භැකියි.
කරපිංචාවල ඇති බැක්ටීරියා හා දිලීර නාශක ගුණවල සමේ ආසාදන දුරු කිරීමේ භැකියාව ද පවතිනවා. කුරුලෑ කුෂ්ට ඉදිමුම් දැවිල්ල වණ ආදිය ඉන් සුවපත්වෙනවා.
පනු රෝග බැහැර කිරීමටත් කරකැවිල්ල වමනය වැනි අපහසුකම් දුරලීමටත් ඊට හැකියි. එහි ඇති විෂහරණ ශක්තිය නිසා සර්ප දෂ්ටවලදිත් ප්‍රතිකාර සඳහා කරපිංචා කැඳ උපයෝගි කරගන්නවා. කරපිංචා කොළ යුෂ ද සත්ත්ව විෂ නාශනයට යොදාගන්නවා.
සිසිල් ගුණයෙන් යුතු කරපිංචා අර්ශස් අමාරුවලට සහන සලසනවා. වැඩි වශයෙන් ආහාරයට ගැන්මෙන් තරබාරුකම නැතිකර ගන්නත ත් පුළුවන්.
කොළ තලපයක් සේ අඹරා හිස ගල්වා සම්බාහනය කිරීමෙන් හිස් සොරි සුවකර ගතහැකියි . කෙස් වැටීම අඩුවීමත් , මනාව හිසකෙස් වැඩීමත්, ඉන් සිදුවෙනවා . දිනපතා වැඩි ප්‍රමාණයක් කරපිංචා ආහාරයට ගැන්මෙන් අකලට හිසකෙස් පැසීමත් නවතා ගත හැකියි.
කාර්ය බහුලත්වය නිසා ක්ෂණික ආහාරවලට හුරුවී සිටින්නන්ට ඉන් සිදුවන හානි වැළැක්මටත් කරපිංචා දායකවනවා.
කරපිංචා යුෂ මුසු කැඳ ගුණදායක වුවද වඩාත් ගුණදායක වන්නේ එහි රොඩ්ඩත් සමග ම ආහාරයට ගත් විට යි. කොළ වියළා කුඩුකර සුදුලූනු ඉඟුරු ස්වල්පය බැගින් මුසුකර කැඳ සාදාගැනීම වඩා පලදායකයි.
කරපිංචා තේ පානයක් සේ සකසාගන්නත් හැකියි. එසේ ම තේවලට මුසුකර පානය කරන්නත් හැකියි.
ලූනු සුදුලූනූ ගම්මිරිස් ස්වල්පව ගෙන සිභින්ව අඹරා දෙහි දමාගත් කරපිංචා දලු ලුණුමිරිසත්, ඊට පොල් ටිකක් මුසුකරගත් සම්බෝලයත්, අධි රුධිර පීඩනය වැනි රෝග ඇත්තවුන්ට ඉතා ගුණදායකයි . ආභාර රුචිය වඩන ඒවා සෑම කෙනකුට ම පාහේ නිරෝගිතාව රැකගැන්මට උපකාරීවනවා.
වෑංජනවලට කරපිංචා ගුණය හොඳින් ලැබෙන්නේ සිභින්ව ලියා හෝ අඹරා දැමීමෙන්. පොල් අඹරා සකසන කොස්මැල්ලුම් ආදියේදී කරපිංචාත් ඒ සමග ම අඹරා ගැන්මෙන් රස ගුණ දෙක ම වැඩිකර ගත හැකියි.

කරපිංචාවලින් අත් බෙහෙත්

*කොලෙස්ටරෝල් පාලනයට
කරපිංචා කොළ , රතුලූනු උම්බලකඩ පොල් ස්වල්පයක්දමා සකසාගත් සම්බෝලයක් ප්‍රධාන ආහාරවේලට එක්කර ගැන්ම.
කොළ මඳපවනේ වියළා ඉඟුරුපියලි සමග තම්බා බීම

*ලේ පිරිසුදුවීමට
කරපිංචා පොතු, සුදුලූනු උළුහාල් ගම්මිරිස් සමග තම්බා බීම

*අධික තරබාරුවට
දිනකට මේරූ කොළ 10 බැගින් කෑම

*බිබිලි සහිත චර්ම රෝග වලට
කොළ එළකිරෙන් තම්බා අඹරා ගෑම

*අර්ශස් හා මල පහසුවට
කොළ, කපාගත් කොහිල අල, උළුහාල් රතුලූණු සුදුලූනු සමග තම්බා උදය හිස්බඩ පානය.

*බඩ දැවිල්ලට , ස්නායු දුර්වලවීමට
කොළ, නැටි, පොතු , බාර්ලි වතුරෙන් තම්බා බීම

*හිසකෙස් වර්ධනයට
කරපිංචාකොළ කොටා දමා උණුකර සකසාගත් පිරිසිදු පොල්තෙල් හිසගැල්වීම