සිරුර රැක දෙන පෝෂක ගබඩාව (ආමන්ඩ් )

 පෝෂක ගබඩාවක් ලෙස වර්තමානයේ ලොව පුරා ප්‍රචලිතව ඇති ආමන්ඩ් වසර දහස්,ගණනක පෙර සිට මැද පෙරදිග රටවල , සිරුර නිරෝගී කරගන්නට ඖෂධීය ආහාරයක් ලෙස යොදාගනු ලැබූවක්.
පසුකාලීනව ඉන්දියාව පකිස්ථානය ආදී අප සමීප රටවලට ද හඳුන්වා දෙනු ලැබූ ආමන්ඩ් Rosacea පවුලට අයත්වන්නක්. ආමන්ඩ් ඇටද ඉන් සකසාගන්නා කිරිද , තෙල් ද ආහාර හා ඖෂධීය වටිනාකමින් යුක්තයි.
විටමින් සපිරි ආමන්ඩ් , E B ප්‍රභේද හා K වලින් වඩාත් පොහොසත්. එය යකඩ කැල්සියම් මැග්නීසියම්, මැන්ගනීස් කොපර් සින්ක් තන්තු ෆෝලේට් ප්‍රෝටීන් හා ප්‍රතිඔක්සිකාරක ගුණවලින්ද සන්නද්ධයි.
දරුවන් මෙන්ම වැඩිහිටියන්ගේත් සම ආරක්ෂාකිරීමේ සුවිශේෂ කාර්යයක එය නිරතවෙනවා .
චර්ම රෝග පාලනය කරන ආමන්ඩ් සමේ කුරුලෑ ලප කැළැල් , රැලි වැටීම්, රළු වීම් , වළකා සම පැහැපත්කර ලනවා. හිරු රශ්මියෙන් ඇතිවන අවපැහැවීම් දුරලනවා . සම වියපත්වීම පමාකර දෙනවා. වැඩිහිටියන්ටද තරුණ පෙනුම ළඟාකර දෙන අතර ළදරු සමද සුසිනිඳුව තබමින් රැක දෙනවා .
ඒනිසා එය බොහෝ ළදරු හා රූප ලාවණ්‍ය නිෂ්පාදන සඳහාත් යොදා ගනු ලබන්නක් .
ආමන්ඩ් ඇට කිරි සමග රැයක් පොඟවා අඹරා මුහුණේ පේස්ට් එකක් සේ ගල්වා විනාඩි 20 ක් තබා සෝදාහරින සත්කාරයෙන් සම රැලි වැටීම් දුරුකර පැහැපත්ව තබාගත හැකි බව සඳහන් .
ආමන්ඩ් තෙල් සම ගැල්වීමෙන්ද එම ප්‍රතිපල ලබාගත හැකියි

ඇස්වලට ගුණදායී E විටමින් බහුල ආමන්ඩ් ඇස්වල පෙනුම ද වර්ධනය කර දෙන්නක්.
ආමන්ඩ් තෙල් ගල්වා සම්බාහනය කිරීමෙන් ඇස් යට ඇතිවන කළු පැහැය ත් දුරු කළ හැකියි.
ආමන්ඩ්ඇට පොඟවා කිරිසමග ,අඹරා ඇස්වටා ගල්වා විනාඩි දෙක තුනක් ඇස් වටා සම්බාහනය කර විනාඩි 10 කින් සෝදා හැරීමේ සත්කාරයෙන් ඇස්වල අඳුරු පැහැ දුරුවී ඇස් දීප්තිමත්වන බව ද සඳහන්.

2014 දී අමෙරිකානු හර්ද රෝග සංගමය ආමන්ඩ්වල ඇති ප්‍රති ඔක්සිකාරක ගුණත් සමග එය හර්ද රෝග හා ආඝාත අවදානම දුරලන්නක් බව පෙන්නා දුන්නා .
නවතම බටහිර පර්‍යේෂණයකින් හෙළිවී ඇත්තේ දිනපතා ඇමන්ඩ් ඇට කෝප්ප 1/3 බැගින් ආහාරයට ගැන්මෙන් හර්ද රෝග අවදානම අවම කරගත හැකි බවයි
හදවතෙහි මිතුරකු ,වන ආමන්ඩ් සතුව රුධිනාල ඝනව තැබීමේ හැකියාවක් පවතිනවා. එය මනා රුධිර සංසරණයකට උපකාරිවෙමින් කොලෙස්ටරෝල් මට්ටම පාලනය කර දෙනවා.

එය සතු කැල්සියම් හා K E විටමින සිරුරේ අස්ථි හා දත් ශක්තිමත් කරමින් නිරෝගිකර දෙනවා . ඇට දිරායාම් පමා කරලමින් ඔස්ටියෝ පොරෝසිස් වැනි රෝගවලට වැට බැඳ තබනවා.
එසේ ම නිය පොතු ශක්තිමත් කිරීමටත් හිසකෙස් වර්ධනයටත් එය උපකාරිවනවා .

රුධිරගත සීනි පාලනය කිරීමටද ආමන්ඩ්වලට හැකියි. එහි අඩු කැලරි ප්‍රමාණයක් අඩංගුවන අතර සිරුරේ බරද අඩු කර දෙනවා .
දිනකට ආමන්ඩ් ඇට අවුන්ස2ක් ආහාරයට ගැන්මෙන් සීනිපාලනය කර ගත හැකි බව සඳහන්.

2015 දී කෙරුණු පර්‍යේෂණයකදී ආමන්ඩ්වල ඇති පිළිකා නාශක ශක්තිය ගැන ද අනාවරණය වුණා.
එහෙයින් එය ආහාරයටගැන්මෙන් පිළිකා අවදානම අඩුකරගත හැකියි.
ස්නායු පද්ධතියේ මනා ක්‍රියාකාරිත්වයක් ඇතිකරන ආමන්ඩ් මොළයේ ක්‍රියාකාරිත්වයත් වර්ධනය කර දෙන්නක්. එමගින් මතක ශක්තිය වර්ධනය වනවා.
ආමන්ඩ් ඇට 20 ක් 30ක් රෑ පෙඟෙන්නට දමා පොත්ත අතුල්ලා සෝදා හැර වතුර වීදුරුවක් සමග බ්ලෙන්ඩ් කර ගැන්මෙන් ආමන්ඩ් කිරි සාදා ගත හැකි අතර අවශ්‍ය නම් සීනි මීපැණි චොකලට් කුඩු ආදිය දමා වඩා රසවත් කරගත හැකියි.